ADWUMADEN

Ebi resu te sɛ anantwie
…pɛ sɛ wɔn yɛ kɔkɔɔ te sɛ esie
Ebi resu te sɛ ampane
…pɛ sɛ wɔn yɛ tuntum abrane
Ebi de ɔyiaw te wiase te sɛ nea wɔn apira
…efirisɛ wɔn ne tintin abɔ abira
Ebi de ehu na ɛhwɛ ɛfɔm
Efirisɛ tintin ɛne wɔn eedi akɔm
Nana Nyame nkutukwii sene n’abɔdeɛ nyinaa!

B.
Ebi anya sika ɛrepiri nkwa
…suro sɛ wɔn bɛwu agya wɔn agyapadeɛ kwa
Ebi ɛredi ohia ɛrepiri owuo
…de ohia ho aniberɛ ɛreti nisuo
Ebi pɛ ano akɛseɛ
…dwene sɛ ano nkitiwa yɛ musuo akɛseɛ
Ebi ɛrepiri ano nkitiwa
…de asɔ wɔn ahoɔfɛ so ayɛ adeɛ
Ebi repiri nufoɔ akɛseɛ
…ebi repiri nufoɔ nkitiwa
Ɔkatakyie wɔ hɔ yi, n’amanehunu so sene n’akyɛdeɛ nyinaa!

D.
Ebi resu atwerɛ ne akenkan
Ebi ɛrepiri atwerɛ ne akenkan
Ebi ɛrepiri mpanyindie
Mpanyin bi redi apenisie
Wɔn a wɔn anyini repiri mmɔfra tepɛn
Mmofra adane adwene amirikatufoɔ ɛrebɔ mpanyin abɛn
Papa yi a Ɔkata suro ne fɔm yi, w’abɔ nnipa anya akoma-atideɛ!


E.
Nnipa biara ɛrepiri biribi a ɛwɔ ne nua ho
…abu wɔn ani agu wɔn ahoɔfe so
Nisuo bɔne amemene nisuo papa
Ama anisɔ aforo abonfia apata
Ototorobonsu tɔ nsuo a, w’ahunu amane
…Ɔbɔ awia a, w’anya amane
Ahunuabobirim ɛhaw a ɛso no deɛ
…ɛsene ewiase ne ne nkatasoɔ nyinaa!
Amoafowaa Sefa Cecilia © June 25, 2021