ƐNA YƐ NA

Ɛna yɛ na
Ɛna te sɛ abɛ dua
Wɔn ma yɛn bɛdɛ a yɛ de bɛsua yɛn bra wɔ nkɔsoɔ bra mu
Wɔn ma mmɔfra ɔdɔ mmɛ a emu nsuo tenetene yɛn tɛkrɛma
Wɔn ma wɔn mma nhwɛsoɔ adwennwu ne nnwu
Ma wɔn de adesua de kye de bɔ wɔn bra
Wɔn ma wɔn mma prayɛ ma wɔn de prapra wɔn abrabɔ mu
Wɔn ma wɔn mma nsafufuo ne ne nsa dene
…ma wɔn de sua abrabɔ mu kankɔ ne fɔmbɔ mu asuadeɛ
Wɔn wuo mu mpo no
Wɔn ma nkae akɔkono de kyerɛ sɛ adeɛ wu a
…na ɛnseɛ yɛ

B.
Ɛna yɛ na o
Ɔyɛ wo ntama a wo fra wɔ w’awɔ mu
Yɛ nsayɛm a ɛpupa wo nisuo wɔ dahiada mu
Ɔyɛ wo kanea a ɛkyiren wɔ w’adaebɔnesoɔ mu
Yɛ wo aniwa a ɛkyerɛ wo ɔkwan pa wɔ w’ahoyerayera mu
Ɔyɛ wo nanteseɛ
…yɛ wo sereɛ
San yɛ nsa a ɛde nsɛmbɔ hyia wo nkoguo ne wo nkunimdie


D.
Ɛna yɛ na nti na wɔn abasobɔdeɛ wɔ asaase yi so
Asaase ase, ɛne soro
Enti dware wo na ɔdɔ
Sra no ngyegyesoɔ nku
Hyɛ no abodin papa ataadeɛ
Bɔ no asomdwoe duku
Hyɛ no mpaboa a wo de subanpa ayɛ
Na tutu anigyeɛ ahwamhwamdeɛ gu no so
Efirisɛ ɛna yɛ na
Na ɛna yɛ korɔ
Ɛna yɛ na
…ɔno a ne wo abrabɔ hyɛn
…a wo ka de baa ewiase yi mu
Amoafowaa Sefa Cecilia © May 7, 2021