ADƆFO YƐ NA

Sɛneɛ asikyire frɛ ntatia
Efunu frɛ nwansena
Akɔmbi frɛ moatia
Sika ma nyansa no
Nyɛ saa na abrabɔ kɔ tɔɔtii ma ɔbrabiara
Enti nya asɛm hwɛ!

B.
Sɛ asan bɔ wo firi adefotepɛn
…ɛbɛtɔ ahiafoɔ gyinabea a
Ɛhɔ na wo bɛhunu sɛ namfoɔ wɔ boɔ
…nyansa yɛ sika
…ahoɔfe wɔ ne boɔ
…mpo aniwa wɔ ɔtan kasa
Onua nya asɛm hwɛ oo!

D.
Aniwa bi bɛtumi de adapaa a enni nsɛmka
…akyerɛ w’ase
Anobi bɛtumi de nsɛmkwaa a ekura nkrantɛ
…adwedwa wo sɛ akranteɛ nam a ɛnso atɔfoɔ
Nsatea bi bɛtumi de wɔn ho fi
…adane pia awowɔ wo defedefedefe
Abranteɛ nya asɛm hwɛ ooo!

E.
Sɛ asɛm to wo a
Akokɔ biara ahomrakye kokorokoo yɛ wo ho kwaadu
Ano biara tweapea ɛko n’anumkankan yɛ w’asɛm
Mframa biara anuohyeɛ a ɛma nfifirinsawa yɛ wo nsa ano ntwɔrɔyɛ
Adeɛbiara tɔnyɛ mpae yɛ wo suban bɔne
…nea y’ahunu ne nea yɛnhunuyɛ nyinaa yɛ wo mfatadeɛ
Wɔn a wɔbɛsua wo wɔ apanpanso akɔtɔn no
…bɛ yɛ wo nwanwa;
…nkan adɔfoɔ a wɔde anuɔde bɔɔ w’abodin!
Ababaawa nya asɛm hwɛ ooo!

Ɛ.
Nti wo ho ntii twoma a
…ka w’ano dwom
Sɛ yɛɛto obi ho aniwuo nnwom a
…ka w’ano dwom
Ɛfirisɛ ɔbra akwantuo nni gyinabea krɔ
…nea ɔwɔ soro nɛ bɛtumi ati abɛtɔ fam ɔkyena sei puu
Enti nya tima
Na ɔbra mu afidie yi wo a
…w’anya ɔboafoɔ
Amoafowaa Sefa Cecilia © August 2020